Nýjar leiguíbúðir Bjargs íbúðafélags á Akureyri

Eins og áður hefur komið fram á síðunni þá er Bjarg íbúðafélag að byggja 16 leiguíbúðir við Langamóa 1 og 3 í Móahverfi á Akureyri.

Þar sem nú styttist í úthlutun, en úthlutun á fyrra húsinu hefst í næstu viku, þá vill Bjarg vekja athygli á þessum 16 nýju íbúðum sem eru í byggingu í Langamóa á Akureyri þar sem mikilvægt er að félagsmenn sem þarna eiga rétt séu örugglega upplýstir um málið.

Áætlað er að íbúðirnar verði tilbúnar til leigu í júlí 2026 og í nóvember 2026. Sjá frekari upplýsingar um úthlutun og upphaf leigu hér.

Opið fyrir umsóknir
Vert er að minna áhugasama á að núna er opið fyrir umsóknir. Á heimasíðu Bjargs fá finna eftirfarandi upplýsingar varðandi hvernig sótt er um:
Umsókn um íbúð gerist í tveimur skrefum og gerist rafrænt á heimasíðu Bjargs í gegnum "mínar síður". Fyrst skráir umsækjandi sig inn á biðlista hjá Bjargi íbúðafélagi. Skráningum á biðlista er raðað upp í þeirri röð sem þær berast og virkjast þegar greiðsla staðfestingargjalds er frágengin. Í hvert sinn sem íbúðir eru lausar til umsóknar sendir Bjarg póst á alla á biðlista með nánari upplýsingum. Ef áhugi er á tiltekinni staðsetningu þarf umsækjandi að senda inn umsókn. Úthlutun hlýtur sá umsækjandi sem uppfyllir öll skilyrði um úthlutun, hefur lægsta númer á biðlista og að teknu tilliti til forgangs, sbr. gr. 4 í úthlutunarreglum.

Íbúðirnar eru í tveimur húsum sem eru tvær hæðir, auk sameiginlegrar hjóla- og vagnageymslu. Þar má finna 2ja til 4ra herbergja íbúðir. Gældýrahald er leyft í hluta íbúðanna.