SGS - Stjórnvöld verða að axla ábyrgð

Á heimasíðu Starfsgreinasambands Islands segir að í kvöldfréttum RÚV í gær voru forseti Alþýðusambands Íslands og framkvæmdastjóri Samtaka atvinnulífsins sammála um að stjórnvöld verði líka að axla ábyrgð á því að ná niður vöxtum og halda aftur á útgjöldum hins opinbera sem eru á sjálfstýringu.

Fram kom að í lok nóvember í fyrra mældist verðbólgan hér landi 3,7% en í lok júlí var hún komin upp í 5,3%. Til þess að kjarasamningar sem skrifað var undir í mars 2024 eigi að halda verði verðbólgan að vera undir 4,7%. Eins og staðan er í dag bendir fátt til þess að það náist og telst það því forsendubrestur sem setur kjarasamninga í uppnám.

Stjórnvöld eru sjálf að kynda undir verðbólgunni með því að boða hækkanir á opinberum gjöldum á sama tíma og glíman við verðbólguna stendur sem hæst og forsendur kjarasamninga eru við það að bresta.

Stjórnvöld hafa boðað tuga prósenta hækkanir á skráningargjaldi í Háskóla Íslands og komugjaldi heilsugæslu sem fara út í verðlagið og ýta þar af leiðandi undir verðbólguna. Samkvæmt greiningu Landsbankans mun hækkun skrásetningargjalda bara ein og sér bæta um 0,07% prósentustigum við verðbólguna.

Líkt og fjallað var um í byrjun árs ályktaði formannafundur SGS en þar var skorað á ríki og sveitarfélög að axla ábyrgð á gjaldahækkunum sem voru langt umfram verðbólgu, þvert á loforð við undirritun kjarasamninga í mars 2024. Aðilar vinnumarkaðarins skrifuðu undir fjögurra ára kjarasamning með hófstilltum launahækkunum gegn því loforði að ríki og sveitarfélög myndu halda aftur af gjaldskrár- og verðhækkunum.

Um áramótin höfðu stjórnvöld innleitt kílómetragjaldið sem hækkaði meðalkostnað heimila um 6,5% á milli ára og einnig hækkuðu vörugjöld á ökutæki um 10%.

Ljóst þykir að nýlegar hækkanir ríkisins eru ekki til þess fallnar að létta undir með launafólki í baráttunni við verðbólguna og það ætli sér að standa við gefin loforð.