Verðlagseftirlit ASÍ - Ný verðkönnuna á sumarnámskeiðum

Verðlagseftirlit ASÍ hefur tekið saman kostnað við hin ýmsu sumarnámskeið sem standa foreldrum til boða. Almennt eru tækni-, list-, og reiðnámskeið dýrust en sumarfrístund (á vegum sveitarfélaga), skátar og ýmis námskeið hjá íþróttafélögunum ódýrari.

Margir foreldrar eru háðir því að geta sent börn sín á sumarnámskeið enda fá flestir foreldrar styttra sumarfrí en börn þeirra og því þarf að brúa bilið meðan foreldrarnir eru í vinnu. Mikið úrval er af sumarnámskeiðum fyrir börn og er kostnaðurinn við þau afar misjafn. Nokkur sveitarfélög bjóða upp á sumarnámskeið fyrir grunnskólabörn á góðu verði en alls ekki öll og geta foreldrar því lent í að þurfa að greiða háar fjárhæðir fyrir sumarnámskeið.

Sumarfrístund ekki í boði í öllum sveitarfélögum
Grunnskólar enda flestir eftir fyrstu vikuna í júní og byrja aftur síðustu vikuna í ágúst en gera má ráð fyrir að flestir foreldrar eigi um 5 vikur í sumarfrí sem þýðir að eftir standa um 5 vikur sem þarf að hafa ofan af fyrir börnunum. Í meðfylgjandi töflu má sjá dæmi um verð á nokkrum námskeiðum.

Ekki eru öll sveitarfélög með sumarnámskeiðum á sínum vegum. Sum sveitarfélög styrkja frístundastarf á vegum íþróttafélaga eða annarra samtaka og fyrirtækja. Úrval af sumarnámskeiðum er afar misjafnt milli sveitarfélaga og verðið einnig en það getur skipt foreldra miklu máli að sumarnámskeið séu í boði á viðráðanlegu verði.

Tækni-, list-, og reiðnámskeið dýrust
Kostnaður við að hafa barn á námskeiði yfir sumartímann er afar misjafn og fer eftir því hvort börn þurfa að vera allan eða hálfan daginn og hvers konar námskeið foreldrar vilja senda og/eða geta sent börn á. 
Námskeið í tækni/tölvum, listgreinum og reiðnámskeið eru meðal dýrustu námskeiðanna sem verðlagseftirlit ASÍ tók saman. Þannig kostar klukkutíminn á forritunarnámskeiðum hjá Skema t.d. 1.300 kr., um 1.600 kr. hjá Myndlistarskólanum í Reykjavík, 1.400 kr. í Kramhúsinu og frá 1.000 kr. upp í 1.600 krónur hjá hinum ýmsu reiðskólum. Þá kosta sumarbúðir talsverðar upphæðir þrátt fyrir að tímagjaldið sé ekki endilega svo hátt. Það er sennilega ekki á færi allra foreldra að senda börnin í sumarbúðir en 5 dagar í Vatnaskógi kosta 48.900 kr. og heil vika í Ölveri 56.800. 

Sumarfrístund, skátar og ýmis námskeið hjá íþróttafélögum í ódýrari kantinum
Til samanburðar kostar klukkustundin í sumarfrístund 262 kr. hjá Reykjavíkurborg, 200 kr. hjá Seltjarnarnesbæ og 254 kr. í Hafnarfirði. Þá eru ýmis íþróttanámskeið í ódýrari kantinum og má þar nefna að klukkutíminn kostar 278 kr. á skautanámskeiði hjá Birninum/Fjölni, um 370 kr. í sumarskóla TBR (Badminton ofl), 288 kr. í Knattspyrnuskóla hjá Víkingi og 343 kr. í leikjanámskeiði hjá Val. Skátanámskeið eru einnig á frekar hagstæðu verði miðað við önnur námskeið en klukkutíminn á slíku námskeiði kostar um 400 kr.

Hér má sjá allan verðsamanburð í töflu 

Um úttektina
Skoðuð voru verð á námskeiðum íþróttafélaga, á vegum íþrótta- og tómstundarráða, sveitarfélaga, skátafélaga og frjálsra félagasamtaka. Námskeiðunum í könnuninni er skipt eftir fjölda námskeiðsdaga og klukkustunda á dag. Víða er boðin gæsla á morgnana áður en námskeiðin hefjast, í hádeginu og eftir að dagskrá námskeiðanna lýkur á daginn. Misjafnt er hvort greiða þurfi aukalega fyrir þessa gæslu eða hvort hún er innifalin í námskeiðsgjaldinu. Sama er að segja um hádegisverð og hressingu, matur er sjaldnast innifalinn í námskeiðsgjaldinu en oft er hægt að kaupa heitan mat gegn vægu gjaldi. Það gjald sem gefið er upp í könnuninni er ávallt miðað við eitt stakt námskeið þannig að ekki er tekið tillit til afsláttarverðs t.d. iðkendaafsláttar eða systkinaafsláttar. Við samanburð á verði námskeiða er því nauðsynlegt að hafa þetta í huga.
Auk þess ber að athuga að hér er aðeins um verðsamanburð að ræða og sú þjónusta eða dagskrá sem í boði er á námskeiðunum er ekki metin. Úrvalið af sumarnámskeiðum fyrir börn og unglinga er mjög mikið og þessi könnun nær aðeins yfir hluta þeirra.