VIRK - Nýti mér góð verkfæri frá VIRK
Viðtal við Pétur Má Guðjónsson, þjónustuþega hjá VIRK, sem birtist í ársriti VIRK 2026.
Pétur Már Guðjónsson er fæddur 1971 og er frá Akureyri. „Ég lauk starfsendurhæfingu hjá VIRK í september 2024 eftir sextán mánuði, byrjaði í maí 2023,“ segir Pétur.
Hvað varð til þess að þú leitaðir til VIRK?
„Ég fór í það sem kallað er „burnout“ eða kulnun. Ég var inni í eldhúsi heima hjá mér þegar þetta gerðist, við eldhúsbekkinn var eins og einhver slægi mig í bakið, ég fór að ofanda og fékk einhvers konar taugaáfall. Sem betur fer var konan mín heima, hún hafði starfað á bráðamóttöku, henni fannst líklegast að ég væri að fá taugaáfall og hún aðstoðaði mig, talaði við mig og róaði mig. Sama dag leitaði ég til læknis. Hann sagði að ég hefði ofgert taugakerfinu og skrifaði upp vottorð um að ég þyrfti að fara í veikindaleyfi,“ segir Pétur Már.
Hvað starfaðir þú við?
„Ég var í hlutastörfum hér og þar, við viðburðastjórnun, leiklistarkennslu á tveimur stöðum og svo var ég flugvallarstarfsmaður. Þessi samsetning kallaði á mismikla vinnu en reyndist of mikið til langframa.
Ég er með viðburðastjórnunarmenntun og hef tekið í fjarnámi og á ýmsum námskeiðum leiklistarnám, var um tíma í Listaháskóla Íslands að læra leikstjórn með ungu fólki, það er reyndar mín sérgrein. Áður en þetta gerðist starfaði ég líka við fjölmiðlun, rak útvarpsrás hér á Akureyri og vann fyrir um tuttugu árum hjá RÚV, síðast var ég svo hjá Árvakri K100 í fréttalestri.“